MSG 2016回顧 & 2017發展方向

首先多謝大家一直關注並支持MSG,今年各大小遊戲比賽都接近尾聲,又係時候同大家一齊(圍爐打J)回顧一下今年MSG創下嘅偉業,同時公佈下個年度嘅發展方向!

由大家最關心嘅《英雄聯盟》戰隊開始講起,我地今年出戰三次公開比賽,包括Logitech春季賽、多蘭盃以及港澳秋季網吧盃,三次我地都派上左唔一樣嘅陣容出戰,而且每次都係臨時拉伕,係比賽前唔夠一星期先開始練習同磨合,最後光榮地三戰全敗,延續「首圈止步」神話!LOL隊由創隊至今,係公開賽事嘅勝率係零呀,「零」呀!有見及此,我地積極引入新成員 (新上路?),並且努力檢討LOL隊後勤垃圾嘅問題 (因為而家LOL係打後勤戰),黎緊仲會多啲同其他業餘戰隊團練,務求係2017打破呢個宿命! (搵次齊人團練先講)

然後就到《鬥陣特攻》戰隊,有傳奇經理MSG Manager同一代宗師MSG Heovax坐陣嘅OW隊首戰就拎到季軍,我地當然會繼續努力等OW隊幫MSG發揚光大,贏多啲比賽令MSG拎到更多煲水,而我地將會維持原有陣容之餘,再加入新血(MSG SugiChan – 潛力新秀,MSG Zetalll – 主帥,MSG HaFi – 局住用)去增強實力(主要因爲核心成員DReaMCliFF掛住玩WOW),以便為來年嘅一系列賽事做好準備!

而其他遊戲戰隊以及舉辦活動方面,我地亦會作相應嘅調整。我地雖然撚屌,但都只係一隊業餘戰隊,我地都好清楚作為一支業餘戰隊嘅事實,就係往往代表住,我地只有好有限嘅時間同資源去投放落某啲遊戲度。係考慮到遊戲嘅發展前景,所以我地決定忍痛摺起以下兩支戰隊,當中包括帶比我地好多歡樂回憶嘅《皇室戰爭》(垃圾game,好似係) 戰隊,以及根本連一場都未正式比賽過嘅《爐石戰記》(咩黎?食得?) 戰隊。同時,我地亦好sorry咁inform大家,因為我地MSG「棟糧基金」已經用晒,我地唔會再搞有關呢兩隻遊戲嘅比賽,我地會集中資源提升戰隊實力,做番一支純正嘅「戰隊」。

當然,舊嘅唔去新嘅唔黎,我地知道手提電競呢個市場,的確有佢嘅潛力,而相信MSG入面都不乏臥虎藏龍,所以有強者加盟前提下,我地將會開辦《Pokemon Sun/Moon》戰隊,食住個勢希望可以幫MSG係另一個層面繼續煲多啲水!

所以來年MSG將會以《鬥陣特攻》、《英雄聯盟》、《Pokemon Sun/Moon》三大核心作發展!此外,除左以上三大遊戲外,我地會繼續「營運」《街頭霸王V》同《反恐精英》戰隊,繼續掛個名但係冇人練習,冇人參加比賽。而有消息人士指出,MSG密謀緊籌組成個MSG得一個人玩嘅《文明帝國VI》戰隊,希望可以刀仔鋸大樹,建立奇功!

最後,Make Sense Gaming會繼續秉持一貫作風,屢敗屢戰都要為大家帶來歡樂,因為我地都係真心鍾意電競嘅,請大家繼續關注MSG!

#ToTheWorld

1 Comment
  1. Qwew

  2. Comments are closed.

Twitter